During the awarding of the 26th Siargao International Surfing Competition

         Way kabutangan nan ako pasalamat sa bag-o ra na natapos na 26th International Surfing Competition dinhi sa Surfing Capital of the Philippines, an Gen. Luna, Siargao. Mapasalamaton ako na ijo Mayor sa Gen. Luna, una, sa kan Cong Bingo Matugas sa pagpangulo para mapahigayon inin maisogun na lakang sa pagbalik sa surfing sa Gen. Luna gikan nan pandemic sanan Odette. Salamat isab sa mga sponsors sa ila pagsalig; sa mga surfers sa ila pag-intra, sa mga bisita na nogahin nan panahon para mosaksi sa ato surfing competition sanan motan-aw sa kagana nan tibuok Siargao. Dako isab an ako pasalamat sa Philippine Sports Commission Chairman Jose Emmanuel “Noli” M. Eala, sa mga kadagkuan sa WSL, sa UPSA sanan sa ako mga kaibanan sa LGU nan Gen. Luna. Dili nako mahimo na malampuson an ako mga plano para sa karajawan sanan kalambuan kun waya kamo magpalujo sa ako. Salamat sa mga lungsuranon nan Gen. Luna sa pagsuporta nan ato kalihukan, sa kooperasyon para sa mga tumong nan ato lungsod.

         Labaw sa tanan, salamat sa Makagagahom na Dios sa pagtugot sanan paggiya sa ato kalihukan, kun diin an tanan himaya, angayan na ibalik sa Ija. Sama sa surfing, an 26th International Surfing Competition nosuong isab sa mga dagko na bayod nan mga hagit sanan problema, pero kay tungod nagtinabangay kita, nagmalampuson an ato surfing event. Balikon ko, SALAMAT KARAJAW SA IJO TANAN!

         Magkita ta nijo pag-utro sa 27th International Surfing Cup kuman 2023 dinhi gihapon sa Gen.Luna. Kuman pa daan, mangandam na kami sa ijo pagbalik!

         Mobangon an Siargao, an Gen.Luna, bisan pa man sa mga kalisud sanan pagsulay. Nagsugod na an ato pagbangon. Nagsugod pa. Ajaw pagbuhi, ajaw pagbija. Mag-iban pa kita hangtud sa umaabot na mga paglambo sanan pagmaya, mahal ko na Lungsod nan Gen. Luna!